第一次玩沙沙– 13.6.10 (15個月7日)

今日去咗黃金海岸, 係鈊洮第一次去沙灘, 咁啱今日爸爸要開工, 唯有一支婆搞掂。

可能環境陌生, 同第一次接觸啲沙, 一直只係呆坐在沙灘蓆上玩沙郁都唔敢郁, 氹佢去前啲同其他bb一齊玩沙都唔肯, 好難至可以請得佢企喺啲沙喥, 但就只係好緊張咁企喺喥, 拖住佢行一步都唔敢, 一陣就喊晒口咁要抱抱, 全日變咗痴身糕葯。

睇番啲相, 鈊洮真係一張都冇笑, 第一次去沙灘唔係好enjoy, 希望下次會好啲, 黎緊都plan咗會帶佢去多幾次沙灘, 下一站仲諗住去貝澳拔hin添

今日天氣都算唔錯, 唔係好晒, 有啲海風吹埋黎好舒服, 只係落咗少少驟雨, 好彩鈊未離開過個帳綘半步, 唔係就實比雨淋濕身, 不過佢就全身沙, 同佢沖身佢都唔敢, 平時喺屋企沖涼時開個水喉就好幾開心, 呢喥濕一濕手手腳腳都喊晒口, 真係細胆。

咁啱今日爸爸喺屯門返工, 離開沙灘後約埋爸爸喺市中心行咗一陣, 食埋飯至返屋企。鈊洮真的很攰, 回程中在小巴上已經瞓著, 直至返屋企同佢沖涼時至整醒佢, 佢攰到連沖涼都唔肯, 喺喥大喊, 坐喺盆喥都唔肯, 唯有快速地沖吓身便算, 唔好阻住佢搵周公。