四姑婆話自從媽媽沒有工作在家以來, 鈊洮變得痴身了, 是痴媽媽。最初我也沒有留意, 只是覺得佢愈來愈痴身, 最近帶佢去bb聚會, 才發覺離開她半步都唔得, 比佢發現我唔係佢身邊, 馬上露出很徬徨的表情, 雙眼四處找尋媽媽的踪影, 當我出現在她視線範圍內, 便開始撒嬌, 大喊。不過, 今日讓我發現都有例外的時刻。
可以肯定呢個囡不是太愛玩, 郤最愛食。今日playgroup既茶點時間, 就是她的至愛。當她看見一碟餅仔出現她面前, 手仔很快捷純熟地拿了最大塊的餅放入口中, 她這個動作似乎不想停, 吃完一塊又一塊, 每次都拿最大塊的那款餅, 其實她每次都不能吃完一整塊, 有一半總是分給了我 (也好, 還記得分甘同味)。當面前的一碟吃完, 見到遠處有另一碟, 便爬過去, 就是這樣, 我可以成功遠離她, 也沒有被她發覺。
今日發現了鈊洮一個很有趣的表現,
今日去咗黃金海岸, 係鈊洮第一次去沙灘, 咁啱今日爸爸要開工, 唯有一支婆搞掂。
可能環境陌生, 同第一次接觸啲沙, 一直只係呆坐在沙灘蓆上玩沙郁都唔敢郁, 氹佢去前啲同其他bb一齊玩沙都唔肯, 好難至可以請得佢企喺啲沙喥, 但就只係好緊張咁企喺喥, 拖住佢行一步都唔敢, 一陣就喊晒口咁要抱抱, 全日變咗痴身糕葯。
睇番啲相, 鈊洮真係一張都冇笑, 第一次去沙灘唔係好enjoy, 希望下次會好啲, 黎緊都plan咗會帶佢去多幾次沙灘, 下一站仲諗住去貝澳拔hin添
今日天氣都算唔錯, 唔係好晒, 有啲海風吹埋黎好舒服, 只係落咗少少驟雨, 好彩鈊未離開過個帳綘半步, 唔係就實比雨淋濕身, 不過佢就全身沙, 同佢沖身佢都唔敢, 平時喺屋企沖涼時開個水喉就好幾開心, 呢喥濕一濕手手腳腳都喊晒口, 真係細胆。
給鈊洮看DVD已有一年的時間, 一直也很懷疑她學會了多少。除了早期發現她聽得明Look up/ Clap your hands等之外, 今日給她看tongue/ mouth的字咭時, 她會伸條脷出來, 和張開咀巴表示, 真的很開心。很相信她其實遠比今天早明白字裡的意思, 但這小妮子偏不肯做出來, 就算要她對婆婆嫲嫲做Bye Bye手勢, 她若是不喜歡做便不會做, 若是心情好時連fly kiss都會大贈送。 總之很相信她其實很多生字也會明白, 只是待沒有表現出來吧！
今天還跟鈊洮做了一件事, 很有趣的, 我決定以後每晚也會做。
臨睡前跟鈊洮回顧今天發生過的事情, 作為一天的總結, 讚賞她做的對的, 和提出她需要改善的地方。最初還以為她會忘記今天發生的事, 但原來不是的。
今天中午帶了鈊洮出外飲茶, 因四姑婆約了堂舅父舅母( 當然還有栢希表弟啦)飲茶, 我趁著上課前有少許空當便帶鈊洮給四姑婆見面。鈊洮見到較陌生的面孔都會定眼望住人家很久, 雖然四姑婆見面較多, 但老是不肯給她抱, 熱身過後只肯對她笑, 連鍚鍚也肯, 但是抱抱就no way, 堂舅父就更加不行了, 總是要痴著媽媽。有一段時間她是肯比四姑婆抱的, 便是餵她食包包時, 可是吃完包包後便要立刻回到媽媽處, 四姑婆還取笑鈊洮變得現實呢。 表弟BB想要拿她手中四姑婆送的扇仔, 她不肯放手之餘還撥開BB手仔。
晚上我逐步引導鈊洮今天去過哪兒, 見過誰, 她當然不會說, 但我說出答案時她會笑笑； 接著問她有沒有對四姑婆笑, 有沒有比四姑婆抱抱,四姑婆送玩具有沒有說謝謝, 她收起笑容, 眼睛望著我, 我對她說要下次見到四姑婆要給她抱抱, 對她笑笑, 不然她便不會買玩具給你啊, 她又再次對我笑；我再說BB要取她手中的玩具, 不可推開他, 要跟他一起玩, 她的反應是, 眼睛轉一轉, 望著我, 之後才露出害羞的笑容, 好像知道自己做錯事一樣。
我可以肯定, 她真的聽得懂, 而我亦感覺到鈊洮真的成長了。
為了訓練鈊洮自己行, 我們嘗試用學行蠅, 可惜她總是要牽著我們的手才肯行, 我們放手, 她便停下來, 我們拉著學行蠅引導她, 她還發脾氣地想鬆開學行蠅, 還大聲地哭, 我們堅持不拖著她的手, 她便寧願爬, 始終也不願意行, 真是不知如何是好??
現在她每逢見了條學行蠅已經怕怕!!
鈊洮一直沒有發燒, 今次是第一次
昨天傍晚開始發熱, 剛食完既粥仔都嘔埋出黎, 心想可能是近來連出幾隻牙仔既併發症。以往鈊洮也未試過發燒, 家中最常發燒的便是爸爸, 一直以來都不太主張食西葯, 故家中成員感冒發燒等都會尋求其他治療方法, 如中葯或食療等代替, 每次爸爸發燒, 都會用蔥豉湯, 第二朝便退燒。今次都照辦比鈊洮試下, 最初擔心鈊洮唔肯飲, 幸好她把所有湯都飲晒, 只是不肯食豆腐, 不過第二朝清早已覺手腳沒有那麼"庆", 穩陣起見, 都想帶鈊洮看一看醫生, 可惜相熟既中醫不在港, 唯有睇鈊洮一直睇開既兒科醫生。出發前再量一量體溫, 又開始升番了, 到診所時已103度, 醫生check過, 除了發燒外, 原來是喉嚨發炎, 唔怪得一直都唔想食野, 今早連平時愛吃既奇異果同火龍果都唔食呢！
好了, 診斷結果出了, 總算一清二楚, 已經滿足到我睇西醫既目的了。 雖然醫生開了好幾種不同顏色的葯水, 還有抗生素, 但結果都沒有食過。回到家, 跟朋友商量過, 幾經爭扎下結果比咗紫雪丹佢食, 可治退燒的, 喉嚨發炎就飲鹽水, 結果午睡過後沖完暖水涼, 身體已經降溫了許多。
晚上聯絡上中醫, 約了明天去睇佢, 還教了一些幫助退燒的貼士：
1) 不能食白米粥, 最好食糙米粥, 現在鈊洮不能食糙米, 可以糙米水或麥米水代替
2) 沖個暖水浴 >> 有散熱作用
3) 不可開行風扇, 冷氣等, 小心被風吹到, 出微汗會有助散熱
4) 飲大量開水
5) 少食一般奶粉, 會腸熱, 最好轉食豆奶
6) 蔥豉湯只適用剛發熱, 及102度以下
7) 如高燒至104度必須看急症了
晚上特別吩咐姐姐煮了麥米水, 作開奶用, 也可預備如半夜要飲水時也可用。
試了多個方法後, 感覺鈊洮體溫已下降了許多。
第二朝起來, 燒已退, 只是有少少咳, 因下大雨, 沒有原定計劃去看中醫, 唯有在電話裡記下葯方到葯房執葯, 晚上再煲給鈊洮食。
今回庆幸總算沒有白費心機, 沒有給鈊洮吃了一直堅持不應吃的西葯。
發覺鈊洮最開心既時間, 除了落地行行之外, 就係食野。
最鍾意食奶奶, 每次見到媽媽拎住個奶樽就勁開心, 知道有奶飲, 出街見到其他BB既奶樽, 就望到實, 好想係自己咁。
而家每日兩餐奶兩餐粥, 下午茶就食水果。粥仔時間亦係鈊洮摯愛, 中午可以食到兩碗粥, 不過就唔係好肯飲水, 唔鍾意用飲管, 鍾意學大人用杯飲, 所以係屋企會比佢用學習杯自己飲, 飲到濕晒就換衫, 佢可以自己拎住個水杯好鬼開心咖! 仲有, 好鍾意飲湯, 仲飲得好快添!
而家知道有粥仔食, 坐喺張High chair喥會好開心咁講mum mum, mum mum, 係有得食mum mum呀! 一面食, 一面做好多表情, 動作, 又用手指篤篤面珠, 有時又學爸爸咁扮鬼臉, 有時成個身喺喥兩面搖呀搖, 總之就好好笑啦！
到了大人食晚飯時間, 又係佢最愛之時, 通常佢都已經食完夜晚餐粥仔, 但都要我地比飯佢食, 一比慢啲就推人隻手, 又喊晒口咁, 真係唔知佢為食定肚餓。
晚飯過後, 相隔冇幾耐時間就到食最後一餐奶既時間, 但佢見到枝奶都仍然咁興奮, 真係大食積。
